Arɩsǝma afɔ́nɔ̀ ‘aŋɔrɔ anantaja ‘ʊshilé akoo kʊja na gɩ ce Boɖi kʊwalʊ. Gɩ kpa Boɖi ma, ba cam atʊ gɩsaná gɩshɛbʊ, ayɛɛ gaɖu ashee atʊ gɩ ɖʊ atayɔkɔ gɩ toŋo ma. Gɩ ŋʊra aboŋo ma, na ba lǝ atʊ gaɖuɩ Baboɖipi ba ɖa na lee bampá kʊwalʊ ma, ɩɖe tɩ lee Boɖi kasukuru ajala nɩ. Gɩ kpa sukuru ɖe nɩ ma, bɛrɛ tuutuuma kǝ ba sǝra aɖoo ayɔgɔ na, galaŋ ʊwalʊ ɖe k’ ʊ tɩ́ lee na. Na ba taa ʊ atɩ n’ asiibi aŋɔrɔ ‘ʊshilé akoo-n’ ʊɖǝn kʊja. Ama atʊ ka gɩ kɔɔ tɩ́ ɖa ŋkǝŋ asiibi ɖe na.
Arɩsǝma ɖe na gɩ sǝ halɩ gɩteŋshile, bɛrɛ ba ɖoo gʊcǝma kaaɖu ma, na gɩ ɖoo n’ atabɔ ɩfɔlɩ nɖee gɩ ɖoo na ma ma, afaŋa pɩ. Naa pala atǝbʊbʊkǝli mbʊɖee bʊ na pala arɛ̀ a kpâ ɛntɛrnɛɛtɩ nɩ aŋǝ atatǝma nɖee gɩ na lee ma.
Gɩ wa na Boɖi kɩkàràkárà nɩ kɩkaracɩ baɖǝn ʊwalʊ ɖe nɩ, kʊɖǝn na gǝŋ ʊŋono ASHANTƖ Suleman, na baɖǝn acǝŋǝ… Ba buro bagʊlɔ arǝŋǝ ŋgaɖee gɩ pɩ na ma ashee pɩ ma, naa aye kal n’ atʊ ŋgaɖee ba wʊɖa ma, aɖʊwaa atʊ gboo gɩ tɔɔ tam alee na pɩ atǝgatǝnleeɖu katǝma kɩfaawɩɩ. Ɩ san na pɩ ɖaa gɩ kʊɖa baamʊnʊ ashee pɩ ma. Bagɩlopí gboo ba ŋǝ wàà, ntǝma nɖee gɩ na lee atɩgɩkrǝ anii kaafala gabʊmbɔnɔ nɩ ma, kɩ n lee njala na. Baɖe ba ŋǝ koŋkaarɩ nɖee SIL a na lee na shee atɩgɩkrǝ anii ma, galaŋ gɩ pàá lâm atʊgʊlɔ na ; gɩ kâra gayɛ ashee anii kagɩkrǝ naa ɖulinya aŋunii a yɔ̂ jɩ. N’ ʊrɔŋ kǝbaja kǝ ba yɔ kaŋfaanɩ na, ɩ tɩɩ fʊ̂ra gacǝŋ kǝbaja.
Gɩ boŋo na bani ma, na gɩ yeeyee ʊwalʊ ɖe nɩ acam na bɛrɛ mbaɖee ba na lo WasAp ma, bɩnɔmba naa gɩ naa tôgo akɔ́lɩ na shee pɩ arɩsǝma baa apaŋa na.
Aŋɔnka : IBRAHIM INUUSA Malookiya