Alaarba afɔ́nɔ̀ ‘aŋɔrɔ akolontaja ɩshilé tǝb-n’ɩnan, gaja kotoku-banyɩʊ-na-tǝb-na-kulumi nɩ na anii kaŋkulo kǝbasǝmprǝ ba sǝba na faŋa bapi ʊŋɔn n’ʊtʊr n’atɩgɩkrǝ anii gʊyá gʊfɔlɩ nɩ KOOSAA.
Alaarba baa apaŋa na tɔɔ na bʊkɔŋkɔŋɔ̀ bʊriu gɩshilikɔnɔ na gɩ na sǝba naa aboŋo bʊkɔŋkɔŋɔ̀ bʊnan gɩteŋshile. Gɩ sǝba n’atɩgɩkrǝ kɩɩbii, naa atɩ na tʊr bʊlei bʊjala halɩ atɩ na tʊr abʊpá.
Gɩ sǝba na bapi bajala mbaɖee kǝ ba kana wʊɖa bʊja bʊnʊn gɩshɛbʊ na ma, halɩ mbaɖee ba tǝ bʊja tǝb na kaŋkǝm ma. Kaŋkǝm gɩ lee koŋkaarɩ awʊɖa akulo ɩnyɩʊ gɩ na cere ma.
Ŋkulo nsǝbaka nni njɩ gǝŋ mbaɖee kǝ ba kana ayɔ ʊtʊr gɩshɛbʊ na ma. Ŋkulo nnyɩʊtaja, nni njɩ gǝŋ nɖee n yɔ ʊtʊr gɩshɛbʊ boŋo ma.
Gɩ ta naa yɛ̂ɛ gɩ sǝ̂ba gɩ na kǝl akuro nɩ àlaŋ naa ʊshilè ʊ pàá gôro na caarɩɩ atʊ na. Naa atine anii katulo kacǝma na yɩɖa na bapi naɩ. Halɩ ba lǝ wàà, ba kpâ ma, atʊ gɩ bɔlɔ ashei nɖee ba sǝ ma, boŋo.
Bapi ba tɩ yɔgɔ ŋkǝŋ. Gɩ ta naa cêre pɩ, ka gɩ na kǝ pɩ na, na karɛ̀ k’a yɔ na, gɩ na faŋa nɩ na aɖe yɔ gɩshɛbʊ. Gɩ lee ntǝma boŋo na shɛʊ ma, atʊ gɩ kɔɔ kǝ gʊcǝma gʊfɔlɩ naa aye ram atǝn.
Ɖaa gɩ na sara ŋkǝŋ ma na gǝŋ. Gaja ga pêle pɩ koŋkaarɩ, naa atɩ ŋkulo nɖe n ɖâ alaafɩya.
Aŋɔŋka : IƉRIISU Muniifatu