Gaja kotoku-banyɩʊ-n’akoo kaŋɔrɔ asǝbaka ‘ʊshilé tǝb-n’ɩnan kʊja ʊ lee ka ʊshilé nɖee GʊGʊ kaŋkulo nɩ, basǝmprǝ banyɩʊ, amʊ BABA BƆƉƖ Saliimatu na MAMAM Ásaná gɩ ce Bakǝmǝkar Bashɩɖɩ nɩ atɩ wa na basǝmprǝ baŋkulo ma. Gʊna GƆMƆ Ɖahaanatu a lee ka ŋkulo nɖe kanɖiyar. Ataniya na wàà, ba yɔ̂ wàà, Gaja kɩŋɔrɔ kagʊbɔ gʊ ɖa n’atɩgɩkrǝ anii. Gʊni kʊ afɔ́nɔ̀ a yɩɖa wàà, [calendrier].
Ba cee wʊɖa bʊwalʊ na lee ʊshilé ɖe. Gɩ kpa ma, na ba pala acam atʊ gɩsaná gɩshɛbʊ. Gɩ lee na pɩ faawɩɩ, atʊr gaja kɩŋɔrɔ kagʊbɔ ashee pɩ. Abɔ ɖe kʊtʊr nɩ, gɩ wʊɖa akɔ́lɩ ɩnyɩʊ ncǝn.
Nsǝbaka : Ba na kǝ na gʊtushe kʊ anyǝm atabɩyarɩ.
Nnyɩʊtaja : Ʊkó a naa rî akawɛɛ, ʊ naa ŋǝ̂ ncuŋo cû njɩ.
Gɩ boŋo ma, na baɖǝn ba taba akɔ́lɩ ɖe kaashɩ na gɩ kʊɖa ashee pɩ.
Ɩ lee ʊciŋkǝrka ashee GʊGʊ kaŋkulo.
