Ʊrɔŋ ɖaa bʊja bʊnan ma na gǝŋ n sǝba àyó kayɩɖa na kaaŋfaanɩ kambʊpá kʊŋɔn ma. Naa ma sǝ̂ba, takaashɩ ɖǝn a jɩ ka atʊ, ka gɩ sara ɩwara na naa aɖa gawara kɩsukuru nɩ ma. Gɩ ta tɔ̂ɔ ɖaa àyó wáá ma, ba tɩ sǝra ayɩɖa gʊyo gʊɖǝn kaŋyɩɖa na gɩfɔnɔ koo Grɛs kagɩja k’á na sǝra ayɔ kagʊyo na, yaa ba pɩ̂ na kɩpi yaa. Gɩ tɩ́ sǝ̂ akiɖe ma, gɩ yɔ àyó ɖǝn kayɩɖa n’anii, ka gɩ yɔ na gɩfɔnɔ na. Naa ayɔ ɩɖǝn na gɩfɔnɔ, ama ka gɩ yɔ ɩ n’anii na.
Gaɖuɩ n faŋa wàà, ɩ sim gɩ yɛ̂ɛ àyó kayɩɖa n’anii aɖʊ na gɩfɔnɔ koo na gɩfɔnɔ aɖʊ n’anii. Naa gɩ sǝ̂ba, gɩ yɛɛ abɔ n’abʊpá nɖee baɖǝn ba cee lee àyó laŋ boŋo ma na. Aɖʊwaa ɩgbɛ baɖǝn ba cee lee ɩ boŋo afǝl. Na gɩ tʊr abɔ n’abʊpá ɖe alaa àyó ɩ gɩ yɔ n’anii naa ɩ ɖa na gɩfɔnɔ ma, na nɖee ɩ ɖa na gɩfɔnɔ naa gɩ yɔ ɩ n’anii ma, alaa akʊɖa kʊɖa aɖʊ n’anii.
Nɖee k’ɩɩ yɔ na ma, gɩ ɖoo ataba bɛrɛɩ ba yɔ ma, ba lǝ atʊ gɩ ŋɔn apele. Ama, n’ʊrɔŋ wáá gɩ naa ɖa ncǝn. Gɩ sǝba na yɛɛ àyó ɩɖǝnɖǝn kɩfoto boŋo gɩ lâa aɖʊ na kayɩɖa naa ɩ kâŋa na bɛrɛ ba naa yɔ̂ ɩ were.
Aŋɔnka : ALƐ ƉJƆBƆ Fuseeni