Asiibi ɩjicimka kaŋɔrɔ ‘ʊshilé akoo-n’ɩnan kʊja, gaja kotoku-banyɩʊ-n’akoo-n’ʊɖǝn na GʊGʊ kaŋkulo n pɛmpɛŋɛ gatǝnleeɖu kaakonu.
Gakonu gaɖe ga cee sɔm ʊkpaʊ ashee ɩtakuku n’ɩlɔɔrɩ n’ɩkei baja. Gʊro kasáà ʊto a ta nyɩ̂, bʊto bʊ na ciɖe ciɖe páá, na sakǝl afʊrʊkɔ asaa acuŋotala na gatǝna.
GʊGʊ kaɖi baja ba sǝ ka alaa gʊfaŋa, ashɩ nfʊrʊkɔ, sǝmaŋ alaa ɩbiriki. Ɩbiriki baɖe pɩ bayifala ba ko gakonu gaɖe afum atǝn ʊlamʊ laŋ apɛmpɛŋɛ n’ʊkpaʊ ɖe. Ba yiu arukɔ gboo ashee ɩkei baja, ba sǝ̂ra ari na kpa na ma fɛɛ.
Ɩ lee ʊciŋkǝrka ashee samaa aŋunii nɖee a na lo gakonu gaɖe ma. Gaja ga pêle bʊcǝma ashee atʊ.
