Bayarɩ bʊwalʊ tǝb-n’ɩnʊn kʊja ba lee ma, Kulumi kampá nɩ na ba wala.
Gaja ga shee atɩŋkulo « Anii kaŋyɩɩ kʊceu » aŋfaanɩ gɩ sǝra ace, asiibi kʊshilé yofo ‘aŋɔrɔ ʊshilé akoo-n’ɩnan kʊja.
Gɩ kpa ŋkǝŋ ma, na gɩ ce atɩ sala atAyà Igoɖo 1ka Kulumi kagʊyarɩ, a ta anyiŋǝ ashee atʊ. Gɩ ɖoo ŋkǝŋ ma, na gɩ ce ʊwalʊ kaaɖu ba shee atʊ gaɖusǝka.
Acǝrá baja afǝlǝfǝlǝ ba pɩ ka ʊwalʊ ɖe, bagǝŋgǝŋǝkǝja, takaɩ baja, ɩsuko baja, na ɖaɖaa kayɔkɔ asʊ̀rá asʊ̀rá.
Atɩŋkulo « Anii kaŋyɩɩ kʊceu » gboo gɩ lee kɔŋsɛɛtɩ na faŋa ɖaa ɩ sim gɩ lêe koŋkaarɩ ayɔ atɩgɩkrǝ kʊŋɔn, kʊtʊr na kʊlǝu ɖeiɖei ma, na ɖaa ɩ sim gɩ tɔ̂ɔ tam naa naa cerecere atǝbapi atɩgɩkrǝ na ataɖaɖaa kayɔkɔ ma, na ɖaa ɩ sim gɩ wʊ̂ɖa suuru naa aɖa fɛɛ nɖulinya nɩ ma.
Gɩ tɩ lo aŋfaanɩ nɖe na nyiŋǝ na shee atǝbayarɩ baŋunii na kɔmin kaɖi baja.
Gaja ga tǝ̂ na atʊ bʊja tuutuuma, gɩ tɩ sala atɩŋkulo kapatrɔŋ n’akar ɖaa ba na lee koŋkaarɩ ashee atɩgɩkrǝ kaŋyɩɩ kʊceu ma.
Gaja ga tɩ̂ atǝganɔ n’alaafɩya.
