SIL kaŋkulo Bashɩɖɩ n lee GʊGʊ gʊsʊ̀rá gʊɖǝn na lǝ na taŋataŋa Korona kʊshɛɖʊ na shee bɛrɛ. Gɩ kʊɖa ncǝn ɖaa ʊshɛɖʊ ɖe ʊ kpa na ɖaa ʊ waga ɩɖulinyala kabʊtǝna bʊŋunii nɩ ma. Gɩ laa afaŋa bɛrɛ ɖaa ɩ sim gɩ sâra naa akǝl ʊshɛɖʊ ɖe n’atalɔ n’atǝbawor gboo ma.
Gɩ kʊɖa kabʊlei bʊŋunii aɖʊ bʊɖuɩ n’ayɔkɔɩ laŋ baa aŋa naa ŋǝ̂ atʊr ma :
- Gɩ lee kaGʊGʊ kpaakpaa gʊbɔ laŋ apara n’apá nɖee ɩ shɩ na lǝ anii ma, kabʊmaŋkǝli laŋ. Togoo kampá nɖee ba na yɩɖa wàà Carashɩ ma, kanɖiyar a shee BABABƆƉƖ Nuhum ʊnyɩŋca a mana ace bapá nɩ atɩ para GʊGʊ ɖe, baa ɖaa ba riŋ ɩbɔɔɖa ma.
- Gɩ ŋɔn nɩ aɖʊ abɔ 20 laŋ alee kaPƉF naa bɛrɛ ba sǝra abɔ atʊr.
https://revue-gugu.org/dist/ed10a_korona/gugu_ed10a_korona.pdf
- Gɩ lee nɩ ɖaa ɩfoto 20 mbaɖee ba shee ntogi na bʊliŋɔnka ba sǝra ayʊga ashee bɛrɛ WasAp laŋ naa ʊnʊbɔɖʊ ʊ mana ncǝn ma. Lî ma pɩ atɩya :
https://revue-gugu.org/dist/ed10a_korona/direct-read_blo.html
- Ʊnʊwǝlǝ ʊ ɖa ba lî atɩya gboo arǝŋǝ.
https://revue-gugu.org/dist/ed10a_korona/mp3-downloads_blo.html
- Kafiɖiyoo a ɖa ɩ lî YuTuub laŋ atɩya akiɖe :
https://youtu.be/NTaUu0pLpYM
Gɩ yʊga ashee anii kǝbapi mbaɖee ba na lee atǝma raaɖiyoo na gayofoŋǝ kabʊfala nɩ ma, ba naa ɖʊ̂ na shee bɛrɛ ba rǝ̂ŋǝ naa ba yɔ̂ kʊyɔʊ. Gɩ yʊga ɩ gboo ashee WasAp na Feisbuk kakulo. Abɔ ɖe ɩ tɩ sir fɛɛ WasAp na ɛntɛrnɛɛtɩ laŋ. Ɩ ɖa atasitwɛb na YuTuub nɩ.
Gɩ shee atʊgʊlɔ ɩjá wàà, ncǝn ɩlaabaarʊ basoŋsono ba ɖa ashee atǝbawor n’atɩgɩkrǝ naa baa aŋa na a tɩ kaashɩ. Naa gɩ lô ɩnyɩŋca ɩŋunii nɖee ɩ ɖa ma, atogo n’ɩlaabaarʊ naa gɩ pàá nyîr bʊpapiri laŋ na.
Gominantɩ a yɔ atalaŋ ɖaa ganɔ gaɖɔŋkɔnɔ kaŋkulo ashee ʊkaŋʊ na ma na.
https://www.gouv.bj/coronavirus/initiatives/96/
Gɩ shee logita korona kaGʊGʊ banyɩʊ naa ashee Mɛɛrii gʊɖǝn.
Anyɩn gboo tʊ̂r ma naa arǝŋǝ ɩlaabaarʊ mbaɖee ɩ kǝ̂l gashɛmpɩɖɩpɩɖɩɩ korona n‘anyɩnaŋʊma ma.
Aŋɔnka : ALƐ ƉJƆBƆ Fuseeni