Arɩsǝma, afɔ́nɔ̀ ‘aŋɔrɔ anyɩʊtaja ‘ʊshilé akoo-na-ganaana kʊja, gaja kotoku-banyɩʊ-n’akoo na GʊGʊ kaŋkulo nɩ kǝbɛrɛ banyɩʊ ba ce Boɖi kampá nɩ ashee apǝrǝcamka. Bɛrɛ baɖe pɩ gǝŋ ƖSA ASIISU Raamaanʊ, IBRAHIM INUUSA Malookiya, ISIFU SƱMAANƱ Mʊstafa na BABABƆƉƖ Nuhum.
Apǝrǝ ɖe ɩ lee ɖooɖooɖo kapǝrǝ nɩ. Ɩ tɩ kal na bɛrɛ afaŋa ɩsoŋsono ɖulinya nɩ kʊsǝu. Bʊkɔ́ɩ bʊ pala naa atɩŋkulo n na yeeyee anii kapá nɩ na cam apǝrǝ ɖe ma na wàà, bapi kǝ ba kɔɔ na sǝ na baŋono na rǝŋǝ apǝrǝ na. Apǝrǝ na baŋono bafaŋa tuutuuma ɩ li na ɖur. Gʊkamakama ɖaa baŋono ba cee na wala bawor na lee ma, k’ ɩ kɔɔ ɖa na.
Naa gɩ ye cê gɩ na cee yɩɖa pɩ na atɔɔ n’ atǝbawor alkawɩlɩ. Baɖe ba kʊ̂l ashee bawor apǝrǝ kǝbacǝja. Gɩ kpa ma, gʊboɖiyarɩgaɖu jɩ ba wala acǝ apǝrǝ gɩ cam. Ɩ lee ʊciŋkǝrka ashee atʊ ɖaa baŋono ba tǝlǝ acǝ apǝrǝ na lige atʊ ɖooɖooɖo kaleu ma. Gɩ tɩ shee pɩ nsala naa naa lǝ atǝbawor wàà, ɩ sim gɩ naa lô ɖooɖooɖo naa ata ɖaɖaa a pàá tɩ́ lî na.
Na koŋkaarɩ ma.
