Alahaɖɩ afɔ́nɔ̀ ‘aŋɔrɔ anyɩʊtaja ‘ʊshilé ʊsǝbaka gaja kotoku-banyɩʊ-n’akoo na Ʊlampǝl kǝbapi ba wala asǝ na yɛɛ Ʊlampǝl kampá kaŋyɩɩ kʊceu. Bʊwalʊ ɖe na ba shee ŋyɩɖa wàà, Alaafɩya.
Ʊshilé ɖe ʊ na pra ʊjaŋ ʊbʊmbɔnɔ ɖǝn na ashee mpá. Babapi tuutuuma ba ɖoo na bʊɖu na bʊtǝna n’apá ɩfɔlɩ apɩ ʊwalʊ ɖe.
Atana AFO TƐNƐ Rubatu n’abasoro mbaɖee ba ɖa ashee Ʊlampǝl kampá kaŋyɩɩ kʊceu ma, ba ɖoo na Gajaamatǝna gboo apɩ ʊwalʊ ɖe.
Kʊshilé ɖe na apǝufɔnɔ baja mbaɖee ba cǝ baŋʊmɩ baku ma, ba tine aku ɖe ashee pɩ.
Ba boŋo ma, na ba faŋa pɩ atǝma kayɔkɔ naa akɔɔ n’ɩsaafɩ ashee pɩ, na lǝ pɩ wàà, ntǝma n bon. Atɔɔ n’ʊshilé ɖe basǝmprǝ acǝna baja ba tǝ ba sǝ̂ra na ce ʊfaŋʊ ŋkǝŋ, na ce bʊŋʊma ŋkǝŋ gboo.
Ba boŋo ma, na Prefee a cam ʊwǝlǝ naa ayɩɖa aɖi baja batʊrka ba yala nɩ ba ce atɩ cǝm asala bafɔ́nɔ̀ baɖe. Bansala nɖe nɩ, baɖe ba tɩ laa na faŋa pɩ wàà, mpá ŋŋunii n na shee pɩ nsala nɖe. Ɩ lee ʊciŋkǝrka ashee samaa aŋunii ashee ɖaa basǝmprǝ acǝna baja kǝ ba kɔɔ na lee wahala na gaɖuŋʊmka na ma.
Gaja ga pâla ɩsono ɩ naa wʊɖa atʊ ɖaa gǝŋ ma, naa mpá n ce ŋyɩɩ.
BABABƆƉƖ SAALIFU Nuhum