Yofo ‘aŋɔrɔ asǝbaka ‘ʊshilé cɩɩnɩ kʊja gaja kotoku-banyɩʊ-na-tǝb-na-ganaana kʊja, n’atʊsoro Jameilu n’aɖɔmpǝla Benlo ba jeɖe SIL kaatǝnleeɖu Bashɩɖɩ ŋkǝlǝ̀ Ajegulɛ. Ba kpa ma, ŋkulo n cam pɩ gɩsaná gɩshɛbʊ. Gɩ toŋo pɩ afaŋa atǝma kabʊɖu n’ayɔkɔɩ gɩ na lo na lee n’atǝma ɖe ma. Ɩfaawɩɩ nɩ, atʊsoro Jameilu wàà, ɩ lee ʊciŋkǝrka ashee aɖe, aɖʊ bʊkɔ́ɩ aɖe a pɩ atɩ ŋǝ ɖaa ntǝma n na sara ashee atɩgɩkrǝ kaŋyɩɩ kʊceu ma.
Ntǝma nɖe kaɖi baja pɩ gǝŋ arɛ̀ n’akar TSASKƐ Martɛɛŋ n’akar Stɛfani, ba faŋa baɖe abʊpá, gaja kɩŋɔrɔ kagʊbɔ, laabaarʊ kabʊsaʊ́ nɖee ɩ ɖa ʊtʊr n’atɩgɩkrǝ anii ma, Bashɩɖɩ kʊwalʊ nɩ. Ɩ lee kpatakɩɩ ashee arɛ̀ a yɔ̂ agɩkrǝ ŋgɩɖee ba ŋʊm na nɩ ma. Ɖaa baɖe ba ɖa Parii wáá ma, baɖe ba ŋʊm bapi. Baɖe kǝ ba sǝra na lǝ na pɩ anii na, shee gɩfɔnɔ. Baɖe ba ta ɖôo gʊkamakama, kǝ ba na sǝra ba nyîm galei alǝ n’ʊpi na. Ɩ pala aɖe a pɩ wáá ma, aɖe shɩ abʊpá ɩfɔlɩ baɖe ba tɩ na kamakama na bapi. Aɖe k’a bʊŋa yɔ anii kɩɩbii na ma, aɖe a na ŋɔn anii na gɩfɔnɔ kɩɩbii nɩ.
Gɩ boŋo ma, na gɩ laa ʊjeɖu kaŋkulo kafoto.
Aŋɔnka : BABABƆƉƖ SAALIFU Nuhum
[avatar user= »nouhoum » size= »original » align= »left » /]