Atalaata, afɔ́nɔ̀ ‘aŋɔrɔ anyɩʊtaja kʊshilé akoo kʊja na gɩ ce ʊwalʊ Koɖowar. Gɩ ta atɩya akpa awʊɖa baa aŋa ŋkǝŋ n’alaafɩya.
Baa aŋa a ɖa jɩŋgaarɩ nɩ. Gaɖu ga cǝm. Ʊwalʊ ʊ sǝba gɩshɛbʊ. Akulo ɩŋunii ɩ sǝba na ɖoo gɩɖǝnɖǝn. Ŋkulo baa mpaŋa na kayaaye. Samaa a sǝ atǝn ayɔgɔ, bayifala na baŋono mpá nɩ ba sǝ. Ɩ lee ma, na ɖelegee gboo a kpa. Bɛrɛ baɖe ba tǝr aŋkǝm halɩ agaɖusǝka.
Acǝma kaŋkǝm, gɩ pɩ n’atɩgɩkrǝ anii kalaabaarʊ samaa nɩ gɩcɩɩca. Laabaarʊ ɖe nɩ, gɩ laa afaŋa samaa riiba nɖee a ɖa ashee arɛ̀ɩ a yɔ agɩkrǝ kʊŋɔn na kʊtʊr ma. Gɩ kɔɔ laa afaŋa samaa takaashɩ nɖee a na jɩ arɛ̀ ʊrɔŋ gɩkrǝ kʊyɔʊ kʊla laŋ ma.
Kaŋkǝm, gɩ faŋa bɛrɛ abɔ asʊ̀rá nɖee gɩ wʊɖa ashee ʊyalʊ́ ma. Bɛrɛɩ ba naa shɩ̂ ma, ba shɩ, apele na bʊbʊkǝli gɩ yʊga ma. Baɖǝn gboo ba sɔlɔ wàà, ba shɩ̂, ama kǝ ba toŋo ɩtanɩ ʊwalʊ ɖe nɩ na.
UMOORU Alijannatu