Alaamɩshɩ ɩjikpaka kaŋɔrɔ ʊshilé tǝb-na-kulumi kʊja na atʊŋono MALAƖKA Nayilu Kparakʊ karaaɖiyoo kalǝlǝja a pɩ atǝgatǝnleeɖu. A wa n’atɩŋkulo.
Gɩ cam nɩ gɩsaná gɩshɛbʊ, alee faawɩɩ ɖaa ɩ sim ma. Atɩfaawɩɩ nɩ, a taba na yɛɛ a fâŋa Anii kasamaa nɖee a na ɖʊ Kparakʊ karaaɖiyoo gʊtɔ ma, ba yɔ̂ bʊkɔ́ɩ ɩgbɛ ɖe a na lee atɩgɩkrǝ Anii laŋ ma. Na ɖaa ɩ na sara, n’ɩnawɩya mbaɖee gɩ na wa na ma, atǝnleeka nɩ na samaa ma.
Ntǝma nɖe kabʊcǝma bʊŋunii, k’ɩ na lal n’atɩŋkulo kanɖǝnɖǝn na. Baŋono mpá nɩ na Anii kabʊpapiri Togoo na Benɛɛ ba wʊɖa banja ŋkulo gboo na kiɖe ntǝma nɖe kabʊcǝma. Ŋkulo nɖe njɩ gɩ na yɩɖa wàà : Ʊyɛʊ kaŋkulo. Ba na kiɖe bʊlipi, ayɩɖa na bʊlei kʊŋɔn kaɖeiɖei.
Ɩ lee ʊciŋkǝrka ashee atɩŋkulo aɖʊ ɖaa samaa a naa ɖʊ̂ gʊtɔ arǝŋǝ koŋkaarɩ nɖee ɩgbɛ a na lee ma, na ɖaa ɩ sim gɩ sɔ̂lɔ atɩgɩkrǝ naa ayɛɛ kaŋyɩɩ kʊceu ma. N’ʊtʊrsoŋsono ma.
BABABODY Nouhoum