Bashɩɖɩ, ɩjikpaka kaŋɔrɔ ‘ʊshilé akoo-n’ʊɖǝn kʊja gaja kotoku-banyɩʊ-n’akoo-n’ɩnyɩʊ, n’alǝlǝja Etiyɛn ƐSƆSAFƐ Ɛf-Ɛm Kufɛɛ kaja a pɩ atɩ wa n’atʊ anii kaŋkulo ; atɩgɩkrǝ anii kaafala gabʊmbɔnɔ nɩ.
Kʊshilé ɖe, a tɩ laa na faŋa atʊ wàà, ɩ lee ʊciŋkǝrka na ashee aɖe ɖaa aɖe a kpa awʊɖa atʊ ma. Aɖʊwaa ʊshilé ɖe, ʊ lee ʊshilé nɖee nɖulinya ŋŋunii n na jɩ gɩkrǝ kajɩŋgaarɩ ma na. Ɩɖe tɩ lee gɩkrǝ ŋgɩɖee ba ŋʊm n’atʊ ma na gǝŋ. Bʊkɔ́ɩ laŋ gɩ tɔɔ wàà, gɩkrǝ ŋgɩɖee ba ŋʊm n’atʊ ma na gǝŋ wàà : Gʊna a na ŋʊm ʊpi ma, bʊlei bʊsǝbaka ʊpi a rǝŋǝ ma, bʊ na ɖoo na gʊna aganɔ nɩ na, ʊpi aɖe tɩ tɔɔtɔɔ.
Alǝlǝja ɖe, a cam baa aŋa na ‘ɩwǝlǝ anyɔnna atɩga. Atǝbʊlei nɩ, gɩ tɩ laa na faŋa wàà, gɩkrǝ ŋgɩɖee ba ŋʊm n’akɩ ma, gɩ lee kpatakɩɩ naa alee ɖoole ashee atʊ, gɩ naa lǝ̂ jɩ ɖaa gɩ san ʊlǝu naa alee aŋfaanɩ ma. Kʊshilé ɖe a pɩ tɩ cam atɩwǝlǝ ma, n’a pala baa aŋa a rǝŋǝ bʊkɔ́ɩ gɩ lǝ ma, raaɖiyoo Ɛf-Ɛm Kufɛɛ nɩ.
Gaja ga pâla, gɩ sǝ̂ra na lǝ atɩkrǝ nɖee ba ŋʊm n’atʊ ma, gɩshɛbʊ.
