Ʊjeɖu raaɖiyoo Ɛf-Ɛm-Kufɛɛ

SIL kaŋkulo kaɖi baja na ŋkulo kǝbɛrɛ banyɩʊ baɖǝn ba jeɖe Raaɖiyoo Ɛf-Ɛm-Kufɛɛ kanɖiyar ʊŋono MUSA Nuuru-Ɖin.

Alaarba arɛ́cika kaŋɔrɔ ‘ʊshilé ʊnyɩʊtaja na gɩ jeɖe Raaɖiyoo Ɛf-Ɛm-Kufɛɛ kaatǝnleeɖu. Ʊjeɖu ɖe ʊ lee gʊsoro kʊjeɖu na. Aɖʊwaa, gaja baa gapaŋa jɩ gɩ ta kpâ gaja gafɔlɩ nɩ, gǝŋci gɩ na yeeyee na sala mpá kaɖi baja, ɖaa : Mɛɛr, Limaamʊ, Sɔja kʊŋono, Gʊpayarɩ, na baŋono jirma kǝbaja baɖǝn…

Ʊshilé ɖe gɩ ta ma, na gɩ ce Mɛɛrii ka gɩ wʊɖa Mɛɛr na, na gɩ pɩ agba nɩ ka gɩ ŋǝ Sɔja bʊŋono gboo na, na gɩ ce Limaamʊ agaɖu. Ama gɩ wʊɖa Limaamʊ afal n’a cam atʊ agʊyo kaamana. Ŋkǝŋ na gɩ sǝ alee ɩfaawɩɩ mbaɖee ba ɖa ma. Gɩ ta Limaamʊ gaɖu ma, na gɩ ce Gʊpayarɩ agaɖu. Gɩ ɖoo ŋkǝŋ ma, na gɩ ye ce Raaɖiyoo.

Gɩ kpa Raaɖiyoo ma, gɩ wʊɖa ʊŋono MUSA Nuuru-Ɖin agatǝnleeɖu. Na gɩ sala nɩ gajɩkalka kansala naa aye lee faawɩɩ anii kagɩkrǝ kanɖi laŋ. Atɩfaawɩɩ kʊboŋu nɩ, n’a toŋo atʊ akpa na Raaɖiyoo kaŋku nɖee nɩ ba na lǝ bʊlei ma. Ŋkǝŋ na ʊŋono Mutawakiilu a taba atʊ ŋgaɖee laŋ gɩ jeɖe pɩ Raaɖiyoo kaafala nɩ ma. Ŋkǝŋ na atɩnɖiyar Martɛɛŋ n’akar Stɛfani ba cam ʊwǝlǝ a lǝ bʊkɔ́ɩ laŋ gɩ jeɖe pɩ ma. Bani baŋkǝm na ba taba amʊ n’atɩgɩkrǝ anii, na n kʊɖa bʊkɔ́ɩ atɩga ba lǝ ma, gboo n’anii.

Atʊjeɖu ɖe ʊ lee ʊciŋkǝrka ashee pɩ ɖaa gɩ pɩ atɩ sala pɩ gǝŋ ma. Ba sɔlɔ wàà, ba tǝ ba yɛ̂ɛ tam ɖǝn ashee gɩ naa kʊ̂ɖa atɩgɩkrǝ kabʊlipi bʊɖǝn raaɖiyoo nɩ.