Ʊrɔŋ afɔ́nɔ̀ ‘aŋɔrɔ cɩɩnɩ kaja ‘ʊshilé tǝb-na-ganaana kʊja gaja ɩkotoku-banyɩʊ-n’akoo ʊ lee ka ʊshilé nɖee gɩ togo ŋkɔ́lɩ gɩwa-n’ɩnyɩ-na-tǝb kanja ma.
Ɖaa gɩ sǝba na togo akɔ́lɩ ɖe na WasAp na shee bɛrɛ baa bɔkɔɩ apaŋa na ma, ʊrɔŋ ɩ lee ka bɔkɔɩ gɩwa-n’-ɩnyɩ-na-tǝb kaja ɖaa gɩ sǝba na pɩ k’ɩ yiɖe na ma. Ɩɖe lee bʊja bʊnʊn bʊ na ce gǝŋ. Ɩ san n’atɩŋkulo páá ashee ntǝma nɖe laŋ n’ɩ pra ɖaa jɩŋgaarɩ ma ashee atʊ. Ʊyʊgʊ na WasAp ɖe, bɛrɛ ɖaa kotoku apǝ́lmǝ na kaatǝrkǝma ma ba ɖa ka n’atʊ na ŋǝ akɔ́lɩ ɖe baa arɩsǝma apaŋa na.
Ɖaa gɩ na sara naa ye na togo akɔ́lɩ ɖe na shee bɛrɛ ma na wàà, arɛ̀ɩ a wʊɖa ŋkɔ́lɩ koo akɔ́lɩ ŋkulo nɩ koo baa ŋka na karɛ̀ a ɖa naa a shɩ wʊɖa ŋkɔ́lɩ ma, aɖe shee atʊ, atʊ gɩ ŋɔn na gɩkrǝɩ a shee ma, naa akʊɖa n’anii na gɩfɔnɔ naa asǝ aceu njɩ wàà, ɖaa karɛ̀ a shee njɩ ma, n sǝ afana ba lǝ gǝŋ aa, atʊ gɩ tɔɔ anyaʊ kaaɖuɖaka. Ɩ ta lêe, atʊ gɩ tɩ lâa na na pɛmpɛŋɛ na kiɖe ʊŋɔn anii na gɩfɔŋkrǝ nɩ ɩ ta jɩ̂ wàà, ɩ sǝ̂.
Gɩ ta na yɛ̂ɛ gɩ pɛ̂mpɛŋɛ akɔ́lɩ ɖe, gɩ na ce ɛntɛrnɛɛtɩ nɩ na tɩ yɛɛ ɩfoto ashee nɖee ɩ sim ba ɖʊ foto ma. Gɩ ta yɛ̂ɛ gǝŋ boŋo, atʊ gɩ kǝ ɩ aman n’akɔ́lɩ ɖe aɖʊ ɩɖe pra ɖaa foto ma.
Gani ga bon ma, atʊ gɩ cam ʊtʊr kʊwǝlǝ afǝlǝ naa ʊtogu kaŋkǝlǝ́ ba tɩ man ɩ aɖʊ naa bacamka ba naa mân na ŋǝ ɩ.
Gɩ ta togo ŋkɔ́lɩ nɖǝn, gɩ na ɖʊ na arɛ̀ɩ a pɛmpɛŋɛ n’arɛ̀ɩ a shee ma, bayɩɖa nɩ.
Galaŋ ɩ lee ʊciŋkǝrka ashee atʊ, na bɛrɛɩ ba na tǝr atɩŋkǝm ma. Arɛ̀ baa apaŋa na a taa sǝ̂ra ashee akɔ́lɩ naa gɩ naa pɛ̂mpɛŋɛ. Lêe ma koŋkaarɩ naa akɔ́lɩ ɖe kʊsheu na WasAp ɩ pàá yâla ŋkǝlǝ́ na. Gaja ga pêle ʊyɔʊ ashee baa aŋa.
Ɩ ta kǝ̂ n’atɩya, ɩ tɩɩ ŋǝ̂ ɖaa atʊsoro Malookiya a na kʊɖa akɔ́lɩ ɖe kabaamʊ na shee atʊ ma.
Aŋɔnka : ISIFU SƱMAANƱ Mustafa