Gaja ɩkotoku-banyɩʊ-na-tǝb-na-ganaana nɩ na gɩ ŋǝ sitwɛb ɖǝn ɛntɛrnɛɛtɩ laŋ ba na yɩɖa wàà, [africanstorybook.org] ma. Sitwɛb ɖe laŋ, ba wʊɖa abʊpá asʊ̀rá asʊ̀rá ɖaa miili na gʊsaʊ na kaakǝma ma. Ɩ wʊɖa ɩfoto basoŋsono. Abʊpá ɖe ɩ ɖa afǝlǝfǝlǝ, ɩɖǝn apǝrǝ, ɩɖǝn ɩsɔɔ.
Sitwɛb ɖe a tɩ yɛɛ a kâŋa n’Afrika kǝbapi ba sɔ̂lɔ abʊpá ɩtʊrka. Galaŋ na ba shee ganɔ wàà, gɩ tɩɩ sǝ̂ra akʊɖa ɩ n’ɩkrǝ tuutuuma. Baɖǝn ba kʊɖa abʊpá ɩɖǝn boŋo n’ɩkrǝ awa-ɩnyɩʊ na kaakǝma.
Galaŋ atʊ gboo gɩ sǝba abʊpá ɖe kʊkʊɖʊ n’atɩgɩkrǝ anii na ɖʊ sitwɛb ɖe laŋ.
Gɩ tɩ laa ɩ gboo ɖaa abʊpáɩ ɩ sǝ̂ra ashɩ ma.
Ɩ lee ʊciŋkǝrka ashee atʊ, aɖʊwaa sitwɛb ɖe a pala gɩ sǝra aɖoo n’abʊpá ɩsoŋsono were.
Ɩ ta naa yɛ̂ɛ ɩ kpâ ncǝn, k’ɩ wʊɖa akoɖǝn ɩ tɩɩ sǝ̂la na. Ʊnyɩŋca ʊ ɖa fɛɛ ashee anyɩn.
Galaŋ gɩ tɩ yɩɖa anii kʊpi baa apaŋa na, a cê sitwɛb ɖe laŋ atɩ tʊr abʊpá tuutuuma n’atɩgɩkrǝ anii.
Na koŋkaarɩ ma.
