Gaja kotoku-banyɩʊ-na-tǝb-na-cɩɩnɩ na amʊ n’aŋkul, gɩ lee gasana gaɖǝn ace Garɩfɔntǝna (Erɔɔpʊ) nɩ atɩ lee ntǝma. Gɩ kpa Gajaamatǝna nɩ ma, na gɩ lee koŋkaarɩ ajeɖe Anii kǝbaja mbaɖee ba ɖa Garɩfɔntǝna gaŋunii nɩ ma.
Aŋɔrɔ tǝb-n’ɩnyɩʊ kaja nɩ, na gɩ ce Holanɖ naa awa na Anii kǝbaja mbaɖee ba ɖa ŋkǝŋ ma. Gɩ faŋa pɩ atabʊpá nɖee gɩ lee ma, n’ɩcǝpǝrʊjala nɖee gɩ ɖʊ Guugǝl Plee Stɔɔr nɩ ma. Gɩ faŋa pɩ sitwɛb n’anii kabʊpá n’anii kapǝrǝ YuTuub laŋ gboo.
Gɩ man atʊr gaja kɩŋɔrɔ kagʊbɔ na ba shɩ ɩ n’abʊpá ɩfɔlɩ gboo.
Gaja kotoku-banyɩʊ-n’akoo kaŋɔrɔ asǝbaka gɩ wa na Anii kǝbaja kaɖi baja Parii Gafɔntǝna [France] nɩ. Gɩ lee faawɩɩ gɩshɛbʊ na pɩ, gɩ man atʊr anii kagɩkrǝ. Na ba shɩ gaja kɩŋɔrɔ kagʊbɔ ɩpi ɩshɩnʊn. N’ɩ san n’atʊ na gɩ ŋǝ bakoŋkaarɩ.
Kaŋkǝm na, korona kagʊmaŋga gʊ kpa, n’ʊmanʊ ʊ yiɖe. N’atʊcine ʊ pɩyɛ, aɖʊwaa k’ɩɩ sǝra ajeɖe Anii kǝbaja mbaɖee ba ɖa Ɛspanyɩ, Sʊwɛɖ, Gajaamatǝna, Suwis, Gagɛɛshɩtǝna n’Italii ma na. Gǝŋ ma, ɩ kɔɔ lêe ʊshilé ʊfɔlɩ, korona kagʊmaŋga kaŋkǝm.
Ɩ lee kpatakɩɩ ashee atʊ wàà, Anii kǝbaja nɖulinya ŋŋunii nɩ ba yɔ̂ wàà, ayɔkɔ ɩsoŋsono tuutuuma ɩ ɖa atɩgɩkrǝ anii nɩ, gɩ naa lô ɩ baa sáà apaŋa na.
