Ʊyɛʊ kaŋkulo n lee kʊwalʊ akoo-na-cɩɩnɩ kʊja

Arɩsǝma n’asiibi n’ʊyɛʊ kaŋkulo n lee kʊwalʊ akoo-na-cɩɩnɩ kʊja.
Ɖaa gɩ sǝba ʊyɛʊ kaŋkulo katǝma ma, ɩwalʊ akoo-na-ganaana na gɩ lee naa ayiɖe. Ama k’ɩ lee gɩ yiɖe yiɖe wàà, ɩ kpa atʊ na, gaɖǝn ga pala ka na gɩ yiɖe, ŋgaɖe ga jee galei ma na gǝŋ : gʊmaŋga gʊbɔnɔ ba na yɩɖa wàà, Korona ma, n’ataɖibaja bʊmanʊ ʊ jee galei n’ʊwalʊ akoo-na-cɩɩnɩ kʊja ɖe ʊ tɔɔ tam.

Ʊŋono Kaasim Latiifu na Buraima Karim ba tɩ lǝ n’abɔŋɔnja.

Bʊkpaʊ nɩ na ba ŋǝ gʊfaŋa ŋgʊɖee gɩ tǝ̂wǝ n’ʊwalʊ ɖe ma. Gʊni kʊ gǝŋ, gɩ naa sǝ̂ gaka laŋ atamaŋgo abʊmbɔnɔ kaamana na lee ʊwalʊ naa gɩ na sǝ̂ na lǝŋ n’atǝbawor ɖaa gominantɩ a taba wàà, gɩ naa lô ma. Ɖaa gɩ sara naa ʊyɛʊ kaŋkulo n tɩ́ tǝwǝ kʊwalʊ bʊja bʊnyɩʊ kaŋkǝm ma na gǝŋ. Ɩ pala ka n’ʊwalʊ nɖe ʊ lee nɖee ʊ lama tam ma. Aɖʊwaa ɖaa gɩ na lee ɩwalʊ ɖe ma, ɩŋɔrɔ ɩnyɩʊ n’ɩnyɩʊ nɩ gɩ na lee ɩ. Bʊkɔ́ɩ bʊ jee galei naa nɖe kʊja ʊwalʊ ʊ lama tam ma na gǝŋ. Maa gʊmaŋga gʊɖe gʊ mâna, maa gɩ lêe ɩwalʊ ɩ wu gǝŋ aboŋo. Ama, gɩ tǝwǝ ʊwalʊ atǝgatǝnleeɖu kaaka laŋ.

Malookiya Ibrahim a tɩ ŋɔn ʊwalʊ akoo-na-cɩɩnɩ kʊja kabʊlei

Bʊkɔ́ɩ bʊ jee galei gɩ lee ʊwalʊ ɖe ma na wàà, gɩ lee atǝma ɖǝn ayala ŋkǝlǝ̀ na gɩ sɔlɔ wàà, gɩ bôŋo n’atǝma ɖe. Ŋkulo n ɖa koŋkaarɩ nɩ ashee ʊwalʊ akoo-na-tǝb kʊja kʊkpeɖu, bʊkɔ́ɩ gɩ lêe ʊwalʊ ɖe nɩ ma, gɩ ta bôŋo, ɩ tɩɩ rǝ̂ŋǝ.