Gɩ tɩ pɛmpɛŋɛ atǝgatǝnleeɖu kayo na sɩr. Gɩ yɔ wàà, gʊyo gʊ lee aŋfaanɩ kabʊkɔ bʊ ashee arɛ̀ na nɖulinya, laŋ na ɩ sim wàà, arɛ̀ baa apaŋa na a tǝ̂u gʊyo agafala nɩ, ashee kaŋfaanɩ.
Àyó ɖǝn ɩ wʊɖa aŋfaanɩ banyɩʊ, ɩɖǝn ʊɖɔŋkɔnɔ, ama baa kagʊpáŋá kʊ arɛ̀ a tǝu, ɩ lee aŋfaanɩ na. Kanɖee ɩ wʊɖa aŋfaanɩ banyɩʊ ma na gǝŋ, nɖee ɩ na ŋʊm ɩyupi ɩjɩka ma. Ama atǝgatǝnleeɖu, gɩ wʊɖa ayosʊra ɖe ɩŋunii. Gɩ tǝu àyó ɖe nɩ ɩ na fʊra atʊ n’ʊnyǝŋkrǝ, naa naa lo ɩɖǝn kɩyupi na kabɔ.
Gʊyo gʊ lee ŋŋuro kabʊkɔ bʊ, ɩ sim ba tɔ̂jɩ kʊ gboo naa gʊ wʊ̂ɖa alaafɩya. Ɩ pala ka gɩ na pɛmpɛŋɛ atɩja ɖe baa tam apaŋa na. Njǝŋ na tam apaŋa na gɩ na pɛmpɛŋɛ atayo ɖe ? Ɩshilé nɖee gɩ na lee n’atǝma ɖe ma na gǝŋ : alaamɩshɩ n’asiibi. Gɩ ta ŋǝ̂ wàà, àyó ɩɖǝn kɩla ɩ sǝŋkǝla koo ɩ bǝlǝbǝlǝ atǝn, atʊ gɩ tɩ faa ɩ na sɩr.
Aɖʊwaa gʊyo kʊla ʊ ta sǝ̂ŋkǝla yɔgʊʊ, ʊ na tɩ boŋo n’ʊfatǝr na. Kaasaara ɖe na gɩ na bǝla naa naa pɛ̂mpɛŋɛ ɩ. Ɖaa baŋono ba lǝ wàà : « Ba na li bʊto bʊ asaa n’ʊtunyem.» ma, laŋ na gɩ na tɔjɩ atayo ɖe gǝŋ.
Ʊ ta wʊ̂ɖa gʊyo, ɩ sim á naa pɛ̂mpɛŋɛ kʊ naa gʊ wʊ̂ɖa alaafɩya.
