Afɔ́nɔ̀ ‘aŋɔrɔ tǝb-n’ɩnyɩʊ kaja gaja kotoku-banyɩʊ n’akoo-n’ɩnyɩʊ kʊja nɩ na gɩ fʊba atǝgatǝnleeɖu kaŋyɩɖa gɩ na yɩɖa wàà, SIL ma, apra na LIŊGO-BENƐƐ.
Ɩnawɩya mbaɖee ba ɖa SIL kɩɩgbɛ nɩ ma, ba yɔgɔ yɔgʊʊ. Ɩ pala ka na atɩga ba tɔɔ niya wàà, baɖe ba cee wʊɖa ɩgbɛ ɖǝn ba na yɩɖa wàà, LIŊGO-BENƐƐ ma, baɖe ba cee tɩ lee na nɩ ntǝma ʊrɔŋ bʊja tǝb na kaŋkǝm na gǝŋ, ashee anii kagɩkrǝ kaŋyɩɩ kʊceu, ɩ sim baɖe na nyantra atǝwǝ ntǝma n’ɩgbɛ ɖe naa aɖoo nɖee nɩ bɛrɛ ba cee ayɔ n’atʊ ma nɩ.
Gɩ sǝba atatǝma na LIŊGO-BENƐƐ kaŋyɩɖa asǝba na gaja kotoku-banyɩʊ-n’akoo-n’ɩriu afɔ́nɔ̀ ‘aŋɔrɔ asǝbaka ʊshilé ʊsǝbaka atǝgatǝnleeɖu Ajegulɛ Bashɩɖɩ. LIŊGO-BENƐƐ a sɔlɔ a lêe ntǝma ɖaa ɩ sim ma, na ŋkulo ŋŋunii. Arɛ̀ n’akar mpǝu nfɔ́nɔ̀ baja ba lee ka ɩgbɛ ɖe kaɖi baja.
Gɩ tɔɔ wàà, LIŊGO kaŋkulo kaŋyɩɖa nɖee gɩ shee njɩ n’atɩgɩkrǝ ma na gǝŋ : « Anii kaŋyɩɩ kʊcǝu », ashee atɩgɩkrǝ katǝma. Na kɩ n kɔɔ fʊ̂ba ayɔ na.
Ŋkulo kɩ n fʊba na, arɛ̀ n’akar ba lee ka kaɖi baja.
Gɩ lêe ma koŋkaarɩ ashee atɩkrǝ kaŋyɩɩ kʊcǝu.
