Asiibi afɔ́nɔ̀ ’aŋɔrɔ ariutaja ’ʊshilé akoo-n’ɩriu kʊja na Nshem kǝbapi mbaɖee ba ɖa ɖulinya kɩla ɩnan ɩŋunii ma, ba wa bampá nɩ na yɛ̂ɛ kaŋyɩɩ kʊceu.
Ʊshilé ɖe, ba lǝ bʊlei tuutuuma ashee bampá kaŋyɩɩ kʊceu. Bʊlei bʊɖe nɩ, kambʊɖee bʊ lee kpatakɩɩ ashee pɩ ma na gǝŋ : sukuru, ceu (makaranta), bʊto bʊsoŋsono, ʊtonu [courant] n’alaafɩya kaafala logita. Ba lǝ ʊnyɩŋca kaalei gboo bʊwalʊ ɖe nɩ.
N’atɩgɩkrǝ anii kʊliu gɩ na li ma, ɩ pala bannɩnɩ kǝbaɖǝn kǝ ba na fol aku nɩ ashee galei gaɖe na. Arɛ̀ɩ a cam ʊwǝlǝ faawɩɩ baɖe kanɖi laŋ ma, a taba Basheme mbaɖee ba ɖa ʊwalʊ ɖe nɩ ma, wàà : « Ɖaa ɩ sǝ atɩya anyɩn baŋunii ma, anyɩn aŋa naa sǝra atʊr nɖǝn halɩ bʊsǝwa bʊnʊn n’anii kagɩkrǝ ? Aŋa na ba tâba ɩbɔrɩ bayɩɖa n’anii naa a sǝ̂ra ayɔ ashee a pàá cǝkǝla gɩfɔnɔ na ? »
A boŋo afaawɩɩ ma, na ba shee atʊ ʊwǝlǝ, na gɩ ɖoo gɩcɩɩca apɩ na atafaawɩɩ nɖee gɩ wʊɖa ma. Atafaawɩɩ nɩ gɩ pɩ na atatǝma nɖee gɩ lee tɔɔ na gacokol halɩ gakoloŋ ma, na nɖee gɩ na lee ka gɩ ka na aboŋo na ma.
Ba kʊma atɩntǝma gɩ na lee ma, na ba nyiŋǝ ashee atʊ wàà, Gaja ga pâla gɩ sǝ̂ra ace n’anii kagɩkrǝ ŋyɩɩ awu gǝŋ.
N’atʊwalʊ ma, Gaja ga kpâ n’atʊ ʊwalʊ ʊfɔlɩ.
